CEBU, Philippines - Tungod sa pagkatap sa tipdas didto sa kaulohan ning panahon sa ting-tugnaw, bakunahan sa Department of Health (DOH) ang 13 milyones ka kabataan sa nasud.
Hatagan sa DOH og unang pagtagad ang kabataan sa mga lugar nga labing daghan og natalang kaso sa tipdas.
Nagkanayon si Elvira Bongosa sa Philippine Information Agency 7 (PIA-7) nga gipasalig ni Health Secretary Enrique Ona nga lakip nga pabakunahan ang mga batang naa sa 11 ka buwan hangtud 5 ka tuig ang pangidaron.
Sumala pa ni Bongosa nga una nang gipahayag sa DOH nga kaduha angay mabakunahan ang usa ka bata gikan 11-15 ka buwan ug 5-14 anyos.
Dugang pa niya nga tuyo niining maong bakuna nga mahulipan ang kulang nga bakuna sa usa ka bata gikan sa tuig 2011 aron padayong malikay sa maong sakit.
Gisaysay ni Bongosa nga ang kasagarang health center ug regional health unit nanghatag og first dose sa measles vaccine sa 9-11 ka buwan.
Samtang ang ikaduhang bakuna gihatag usab sa mga batang naa sa 12-20 ka buwan.
Gitataw sa DOH nga dali lang masulbad ang problema batok sa tipdas kun magtinabangay ang gobyerno, pribadong sektor ug mga ginikanan nga pabakunahan pagsiguro ang ilang mga anak. (/WC)(BANAT NEWS)