CEBU, Philippines - Wala’y lipud-lipod nga gihagit ni Talisay City councilor Dennis Basillote ang kanhi mga kaalyado niini sa konseho nga hukasan siya sa iyang kasamtangang mga komitiba.
Kini human napakyas ang mga membro sa ALAYON nga langkatan siya og mga komitiba sa wala pa ang tuig 2014 tungod sa pagtapon niini ngadto sa Liberal Party nga gipangulohan ni Talisay City Mayor Johnny Delos Reyes.
Si Basillote sa pagkakaron nagpabiling chairperson sa committee on education ug urban poor.
Gitataw sa konsehal nga wala siya mabalaka kun ugaling kawad-an na siya sa nahisgutang komitiba tungod sa pagbiya niya sa Alayon ug pulihan ni kanhi mayor karon Konsehal Soc Fernandez.
Kini tungod kay nagtuo siya nga mas labaw nga nanginahanglan kaniya ang taga Talisay ilabi na sa grupo sa urban poor ug posibling dili tuohan sa mga tawo ang mopuli unya kaniya.
Masaligon hinuon kini nga makasilbi gihapon siya sa mga urban poor groups sa syudad tungod kay si Mayor JVR mipasalig man kaniya nga mohatag og executive order alang sa pagpanguna sa grupo sa mga urban poor.
Misaad usab ang mayor nga hatagan kini og igong pundo alang sa mga batakang serbisyo nga iyang ihatag sa taga Talisay pinaagi sa mga programa sa mayor. (BANAT NEWS)