Ipatinuod pagsikop sa kapolisan ang tigbaligya’g pabuto

CEBU, Philippines - Gitinguha  sa  Department of Health (DOH)-7 nga dakpon  sa kapolisan   ang mga illegal nga tigbaligya og  pabuto.

Kini aron siguradong kaminusan kun dili man hingpit nga mapugngan ang pagkamatay  ug pagkaangol sa mga tawo gikan sa mga pabuto atol sa pagsaulog sa Bag-ong Tuig.

Ang pangulo sa Regional Epidemiology and Surveillance Unit sa DOH-7  mibasol sa pagsaka  sa gidaghanon sa mga nabiktima sa pabuto sa miaging  Pasko niining tuiga  gumikan  sa  kasayon sa pagpalit og mga firecracker .

Kini tungod  kay gipadaylang lang  ang pagpamaligya  niini sa aseras o daplin sa kadalanan apan  gilabay-labayan lang sa kapolisan.

Matud pa ni Cimafranca nga kun gitinuod pa sa  kapolisan ug kabomberohan ang pagkonpiskar sa mga pabuto nga illegal nga gibaligya sa kadalanan, ang mga tawo mapugos sa pagpalit og mga firecracker  didto   sa fire cracker zone.

Ang  firecracker zone,  lugar  nga  giandam  sa  Local Government Unit  sa ilang  tagsa-tagsa  ka  barangay   ug  ang  dinhi  sa   siyudad sa Sugbo  tua  mahimutang sa South Road Properties (SRP).

Giaghat usab niini ang ubang LGU nga sundon ang gihimo sa kagamhanan sa siyudad sa Mandaue nga mi-ban o nidili sa pagbaligya og pabuto sa ilang lugar pinaagi sa pagdumili niini sa paghatag og permiso sa mga mamaligyaay og firecrackers .

Ila  kining  gihimo  sanglit prisko pa sa  ilang  panumduman ang pagkasunog sa mga lugar sa mga tindahan sa pabuto niadtong nakalabay nga tuig. Giaghat usab niini ang publiko nga magpalayo gyud sa nagpabuto og mga firecracker aron dili kini maangol.

Kini tungod kay sigun sa records sa DOH-7 kasagaran sa mga nangaangol  sa pagbuto sa pagsaulog sa Pasko ning tuiga napiksan o nalabayan og mga firecracker.  (BANAT NEWS)