P25 milyones gahin sa DENR alang sa flood control

CEBU, Philippines - Gigahinan sa Department of Environment and Natural Resources (DENR) 7 og P25.5 milyones   ang kaugmaran sa Cantumog-Luyang Flood Control Structure sa lungsod sa Carmen, sa amihanang bahin  sa lalawigan sa Sugbo.

Dili pa dugay  nagpinirmahay  og  kasabutan  sila si  DENR 7 Regional Executive Director Dr. Isabelo Montejo ug Carmen Mayor Gerald Villamor kalabot  niining  maong  proyekto  nga gitambongan usab sa kadagkoan sa maong buhatan sa kagamhanan.

Naglakip sa mitambong sa maong pagpinirmahay  mao si DENR 7 Regional Technical Director  Al Orolfo para sa  Protected Areas, Wildlife Coastal Zone and Management Services .

Si Dr. Montejo miingon nga ang maong proyekto sa kagamhanan maoy kabahin sa ilang dakong tinguha nga ugmaron   ang proyekto  nga  may  labot  sa  pag-atiman  sa kalikopan.

Tumong  niini  mao ang paghatag  pangalagad  social ug environmental nga  panginahanglan  sa katawhan  ug  sa pagprotiher  kanila  gikan sa coastal pollution.

“The groundbreaking ceremony is set this month and will be completed in a six month period,” ni Montejo pa sa iyang pamahayag.

Dugang pa ni Montejo  nga  kining  maong  proyekto maoy  mosuporta sa mga  programa sa DENR nga gisugdan sa pagpatuman niadtong Hulyo 2007.

Sa maong  higayon   ang ilang buhatan ug ang Asian Development Bank (ADB) ug  ang Global Environment Facility (GEF) mao usab ang nagsuporta sa mga ahensya  nga  sama sa Bureau of Fisheries and Aquatic Resources (BFAR) Department of Agriculture (DA) ug uban pa. (BANAT NEWS)