Mga tawong manuktok og balay gisusi

CEBU, Philippines - Padayong gisusi sa kapolisan sa dakbayan sa Bogo ang mga taho nga dunay mga tawo nga naglibod-suroy sa dakbayan sa Bogo ug manuktok  sa kabalayan sa mga residente.       

Si Supt. Anthony Bagarinao nga nahinabi sa Banat News miingon nga padayon niyang gipasusi ang maong taho.       

Matud ni Supt Bagarinao nga dili niya baliwalaon lamang ang maong mga taho tungod kay seryoso kini.       

Apan gitataw sa opisyal nga siya mismo ang mi-operate sa lugar nga gikatahong may mga tawo nga manuktok sa mga balay sa kagabhion.        Matud ni Supt. Bagarinao nga sa iyang pag-operate sa mga lugar nga gikataho negatibo kini.      

Ang Banat News nakadawat og taho pinaagi sa usa ka concerned citizen nga adunay mga tawo nga manuktok sa kabalayan partikular na sa barangay Siokon sa dakbayan sa Bogo.      

Gani matud pa sa maong concerned citizen nga nasigpatan kining maong mga tawo sa mga residente ug gigukod apan wala kini maapsi kay perting kusogang midagan.     

Si Supt. Bagarinao miingon nga siya mismo nakadawat og taho gani sa miaging gabii iyang gipa-adtoan og 6 ka polios ang maong lugar aron sa pagsusi sa maong mga taho.       

Matod pa sa opisyal nga bisan migawas nga negatibo ang maong taho iya gihapon kining gipasusi.  (BANAT NEWS)