Karambola sa Korean ug mga taga Zapatera

CEBU, Philippines - Angol ang usa ka Korean National ug ang usa ka lalaki human sa usa ka karambola nga nahitabo sa sitio Zapatera sa barangay Luz sa dakbayan sa Sugbo sa alas 5:45 sa miaging hapon.

Ang angol naila nga si Hur Song Ho, 42, Korean national, manager sa usa ka English School sa Talamban, kasamtangan nga nagpuyo sa maong tulunghaan.

Samtang angol sab si Rizalino Agang, 35, dispatser, molupyo sa sitio Zapatera sa barangay Luz sa dakbayan sa Sugbo.

Base sa imbestigasyon sa Homicide Section nga si Agang diha atubangan sa usa sa Korean restaurant nagpahiluna sa mga moabot ug molarga nga mga sakyanan isip dispatser.

Mikalit lang og abot ang grupo ni Hur Song Ho, Kim Gelin Ho ug ni Choi Jong Kim ug migukod kang Agang.

Matud pa dihang naapsan nila si Agang gibali sa tulo ang tuong kamot ni Agang.

Dihang nakit-an sa mga residente sa lugar ang gibuhat sa tulo ka Koreano ngadto kang Agang dali sila nga mitabang hinungdan sa karambola.

Apan ang barangay tanod nga si Delfin Ventura nga misulay pag-uwang sa lamok-lamok miingon sa kapolisan nga usa ka Noel Agang, 28, ang midunggab sa Koreano nga si Hursong Ho.

Naigo sa walang bahin sa iyang lawas si Ho ug daling gidala sa Cebu Doctor’s Hospital.

Samtang gidala sab sa Vicente Sotto Memorial Medical Center si Rizalino Agang.  Human sa insidente wala na makit-i kun asa mipadulong si Noel Agang nga daling nakasibat sa pag-abot sa mga niresponding polis.

Wala pa usab matino sa kapolisan kung unsay hinungdan sa maong kagubot. (BANAT NEWS)