CEBU, Philippines - Ang mga lokal nga kagamhanan sa Northern Cebu nga naigo sa super typhoon Yolanda, mihatag og prioridad sa "safe ug normal" nga suplay sa tubig sa ilang ginsakupan.
Ang mga opisyales sa munisipyo sa San Remegio, Daanbantayan ug Medellin, lakip na sa Bogo City, naghi-usa aron mahibalik sa naandan ang ilang water system, matud pa sa Philippine Information Agency-7.
Ang maong mga lugar, hangtud karon wala pa gihapoy kuryente, kay ang mga poste sa kuryente nangatumba human sa bagyo.
Sa lungsod sa San Remegio, aduna na silay power generator sets aron sa pagpa andar sa ilang linya sa tubig.
May 13 na ka barangay niini mahatagan sa limpyong tubig. Ang maong lungsod adunay 27 ka mga barangay ug mikabat usab sa 5,000 ang mga lumulopyo niini.
Sa lungsod sa Daanbantayan, miluwat na og kamanduan ang ilang mayor ngadto sa ilang Rural Health Unit aron sa pagsiguro nga aduna kini igong suplay sa chlorine alang sa limpyo nga tubig (sa mga deep wells) nga maoy kasagaran tinumdan sa ilang tubig nga mainom.
Ang maong lungsod adunay 12,000 ka pamilya.
Sa lungsod sa Medillin, adunay duha ka gensets, nga gi-abangan, aron sa pagbomba sa ilang tubig.
Ang Medillin adunay 5,000 ka mga apektadong residente.
Sa Bogo City, adunay dakung genset aron sa pag pa-andar sa ilang linya sa tubig kay sa pagkakaron gipatuman nila ang rotational water suplay aron ang tanang molupyo makatagamtam usab sa limpyong tubig mainom.Sa mga bukirang barangay sa maong siyudad, ang City Fire Station na ang nagsuplay niini. (/WC)(BANAT NEWS)