Laing bagyo misulod na sa Pilipinas

CEBU, Philippines - Wala pa gani makabangon ang Kabisay-an sa paglatos sa super typhoon Yolanda, lain na usab nga bagyo ang miabot karon  ug naghulga sa wala pa makabangon nga mga biktima sa 7.2 magnitude nga linog ug supertyphoon.

Ang tropical depression sa sidlakang bahin sa Southern Mindanao misud na sa Philippine Area of Responsibility (PAR) ug gipanganlan karon og “Zoraida.”

Sumala pa sa PAGASA,  uwahi kining nasigpatan 830 kilometros amihanang-sidlakan sa Hinatuan, Surigao Del Sur.

Mas hinay kini sa gikusgon nga hanging 55 kilometros kada oras duol sa sentro niini.

Gipaabot kining moirog sa gipaspason nga 30 kilometros kada oras  ug mosulod sa amihanang bahin sa Mindanao ug Visayas regions.

Gibutang na sa Public Storm Warning Signal no. 1 ang Siquijor, Southern Cebu, Bohol, Negros Oriental, Southern Negros Occidental in Visayas and Dinagat province, Siargao Island, Agusan del Norte, Agusan del Sur, Surigao del Norte, Davao del Norte , Samal Island, Surigao del Sur, Bukidnon, Misamis Oriental, Camiguin island ug Davao Oriental in Mindanao. (Gikan sa Wires/EIM)