CEBU, Philippines - Ang mga sakyanan, pribado man o pangpubliko, maoy numero unong tinubdan sa polusyon sa hangin sumala pa sa Environmental Management Bureau-7 sa Department of Environment and Natural Resources.
Si Rechale Ybañez, ang EMB-7 environmental education and information coordinator miingon sa Kapihan sa PIA Forum kagahapon nga 58 porsiyento sa air pollution nga gikan sa motor vehicles, 28 porsiyento gikan sa mga industriya ug 14 porsiyento gikan sa ubang sources sama sa pagsunog sa basura.
Misaysay si Ybañez nga dismayado sila sa resulta sa random roadside smoke testing nga gipahigayon nila kaniadtong Hunyo sa mga traffic prone areas sa Metro Cebu, diin 80 porsiyento sa mga sakyanan kay mga "smoke belchers."
Matud pa ni Ybañez, sobra usa ka libo ang ni-undergo og random roadside smoke testing alang sa smoke emission ug mao kini ang resulta nga ilang nahipos.
"Dismayado gyud mi kay majority sa mga sakyanan sa Cebu nga ni-undergo sa random roadside testing kay ni-fail gyud sa smoke emission test," matud pa ni Ybañez.
Gumikan niini, mopahigayon ang EMB-7 og usa ka transport forum nga tambungan sa mga transport operators ug draybers karong Nobiyembre 21, 2013 sa Sarrosa International Hotel.
Nagsaulog ang maong ahensiya og Clean Air Month karong buwana diin aduna na usab laing random roadside testing sa siyudad sa Cebu, Mandaue ug Lapulapu.
Aduna usab sila’y ipahigayon nga seminar alang sa vehicle maintenance, fuel management ug eco-safe driving alang sa mga draybers ug operators. (BANAT NEWS)