CEBU, Philippines - Dili pa makapasaka og kaso ang chairman sa Board of Election Tellers ug mga magtutudlo sa Mandaue City nga gitabangan og kulata sa mga supporter sa usa ka kandidato atol sa barangay election niatong Oktubre 28 ning tuiga.
Sigun pa sa administrative officer sa Department of Education (DepEd) Mandaue City Division nga si Dr. Benjamin Tiongson nga ang ilang buhatan dili pa makahimo og legal nga lakang batok sa gikatahong mga supporter ni Dianne Bercede sa barangay Banilad siyudad sa Mandaue.
Kini tungod kay wala pa makaduso sa ilang affidavit of complaint ang biktima nga magtutudlo nga si Mrs. Reah Bertulfo.
Hinuon iyang gitataw nga hatagan nila og igong panahon si Bertulfo sa pagpadangat og tukmang lakang nga legal batok sa mga nagkulata kaniya.
Kini tungod kay ang maong magtutudlo nakasinati og psychological disturbance ug nakaapektar sa pagtudlo niini. Hinungdan nga mihangyo kini nga makabalhin og tudlo sa usa tulunghaan sa lungsod sa Consolacion nga duol sa gipuy-an niini sa dili pa kini makahimo og legal nga lakang.
Nasayran nga ang nahisgutang magtutudlo gikalalis sa mga poll watchers ug mga supporter ni Bercede samtang nagpadayon ang pag-eskutenyo sa usa sa presento sa tulunghaan sa Banilad.
Gituohan nga wala magkasinabot ang grupo ug ang magtutudlo, hinungdan nga gikulata ang naulahi. (/WC) (BANAT NEWS)