CEBU, Philippines - Upat ka mga lalaki ang gidakop sa kapolisan sa sitio Puso Center sa barangay Mactan sa dakbayan sa Lapulapu alas 4 pasado ang takna sa hapon niadtong miaging adlaw tungod sa kalapasan sa liquor ban.
Ang nadakpan mao sila si Liborio Dinso, 59, Porferio Villamor, 47, Edgar Sumagang Boiser, 36, Armando Casinillo, Denso, 40 , nga pulos minyo ug nagpuyo sa Centro sa barangay Mactan sa maong dakbayan.
Karong adlawa sila gikatakdang pasakaan og kaso diha sa piskalya tungod sa paglapas sa Comelec liquor ban.
Si PO2 Riel Palahang sa kapolisan sa Presinto 2 sa Lapulapu City Police Office (LLCPO) nga nahinabi sa Banat News miingon nga ang upat ka dinakpan wala makabotar sa barangay elections kagahapon kay gitanggong sila sa prisohan.
Matud pa ni Palahang nga ang upat ka dinakpan nalabyan sa mga sakop sa Motorcycle Task Force (MTF) sa kapolisan pinangulohan ni PO2 Ritchie Abella maong ilaha silang gisikop.
Wala hinuon sila mohimakak sa pasangil apan mirason nga wala sila masayod nga bawal diay kini panahon sa eleksyon. (/EIM) (BANAT NEWS)