CEBU, Philippines - Duha ka tawo ang gidakop sa kapolisan human giingong namalit og boto niadtong Biyernes sa hapon sa anak sa incumbent nga kapitan sa barangay San Isidro, dakbayan sa Talisay ug sa kauban niini.
Ang mga nasikop mao sila si Marry Ann Geraga, 19, ug Edita Alo, 49, parehong mga residente sa nahisgutang barangay.
Ang misikop sa duha mao si Xyrus Allan Bucao, anak sa incumbent nga kapitan sa San Isidro nga si Marieta “Yehyen†Bucao ug Clint Gonzaga.
Giingong ang duha ka mga gidakop supporters sa usa ka kandidato usab pagka-kapitan sa nahisgutang barangay. Si Geraga ug Alo gitugyan ngadto sa kapolisan.
Gawas kang Bucao, ang kanhi kapitan sa barangay nga si Regino “Hinok†Sanchez ug kanhi mayor sa dakbayan sa Talisay nga si Deliah Tiu ang mikandidato usab sa pagkakapitan karon.
Ang duha ka police investigators nga sila si SPO1 Edgar Causon ug PO2 Dennis Onasin miimbargo sa giingong mga ebidensiya gikan sa mga suspetsado atubangan sa ilang abogado nga si Atty. Raul Bacaltos.
Ang naembargo sa mga polis mao ang usa ka multi-colored bag ni Geraga nga dunay sulod nga 44 ka mga sample ballots, P150 nga kwarta, lima ka enclosed papers, usa ka kolor itom nga ballpen ug usa ka Faber Castel marker nga kolor blue.
Gawas niini naembargo sa mga polis gikan kang Alo ang 22 ka mga sample ballots. Apan ang mga suspetsado gibuhian usab kini ubos sa kamanduan ni Talisay City Comelec Officer, Atty. Gallardo Escobar Jr.
Ang mga complainants gimanduan nga moduso og pormal nga reklamo ngadto sa buhatan sa Comelec batok sa mga suspetsado. (BANAT NEWS)