LTFRB nangluwat og special permit sa molabyog

CEBU, Philippines - Gipasidan-an sa buhatan sa Land Transportation Franchising and Regulatory Board (LTFRB) 7 ang mga  Public Utility Jeepney (PUJ) ug mga bus nga pasaheroan nga  mokuha  una  og  special permit kun molabyog  sila  sa laing  rota ning  panahon  sa barangay election ug  Kalag-kalag.

Si  Regional  Director  Ahmed Cuizon, sa LTFRB 7 miingon nga nagsugod na sila sa pagluwat og special permit ngadto sa mga  sakyanang molabyog.

Kini  aron  sa paghatag  og  kasayon  sa mga sumasakay nga mamauli sa kalungsoran alang sa ilang pagbotar sa barangay election ugmang adlawa.

Matud pa niya nakaluwat  na  ang  iyang  buhatan og  37 ka mga special permit nga gilangkoban sa PUJ ug mga bus nga pasaheroan nga  mobiyahe  sa laing  rota  sa mga  adlaw  nga  nahisgotan.

Hinuon gipasabot  ni Cuizon  nga  lain-lain  ang  special permit  sa election  ug sa kalag-kalag.

Busa  human  sa election,  ang  mga  driver  ug  operator  mokuha  na  usab  og  laing special permit  alang  sa kalag-kalag  sa Nobembre  1 ug 2.

Si Cuizon miingon nga sa Oktubre 31  idestino  na  sa iyang  buhatan  ang mga   personnel sa mga terminal aron ang mga operator sa mga sakyanan nga pasaheroan nga gustong mokuha og special permit mahimo na lamang nga adto sa mga terminal mohimo  sa maong  transaksyon.

Gipasabot  ni  Cuizon  nga  iya  kining  gihimo  sa tuyo nga mapaduol sa mga tawo ang iyang buhatan ug dili na makareklamo nga mahimo pang katarungan ang kalayo ug kalisod sa pagkuha  niini.

Si Cuizon mipahinumdom sa mga drayber ug operator sa mga sakyanan nga pasaheroan sa pagsiguro sa ilang pagbiyahe aron kalikayan ang aksidente pinaagi sa pag-check up daan sa ilang mga sakyanan sa dili pa kini mobiyahe. (BANAT NEWS)