80 porsiyento sa hit and run sa Talisay City nasulbad

CEBU, Philippines - Mokabat ngadto sa 1,000 ang natalang aksidente sa kadalanan sa dakbayan sa Talisay gikan niadtong buwan sa Enero hangtud niadtong Septiyembre niining tuiga.

Ang maong aksidente naglangkob kini sa homicide, damage to property, physical injury, damage to property with physical injury, injured person, hit and run with damage to property, hit and run with physical injury ug uban pa.

Sulod sa siyam ka buwan niining tuiga mikabat ngadto sa 388 ang natalang damage to property nga aksidente sa kadalanan diha sa Talisay City traffic division. Ang damage to property kasagaran niini ang mga sakyanan nga nabanggaan o nabag-iran nakaangkon kini og guba ug kadaot.

Sa nahisgutang mga buwan mikabat ngadto sa 236 ang natalang damage to property with physical injury o dunay tawong naangol o nabun-og sa aksidente, 130 ang serious physical injuries sama sa nabalian sa bukog o nangasamdan, 126 ang slight physical injury o nabun-og,  61 ang hit and run with damage to property, 28 ang hit and run with physical injury, 18 ang ubang mga insidente nga naglambigit gihapon sa aksidente sa kadalanan ug unom ang homicide o dunay namatay sa aksidente.

Si Inspector Rodgene Fudotan, hepe sa City Traffic Division nagkanayon nga sa homicide duha ang napasakaan niini og kaso ug upat ang settlement o nahuyo lang.

Matud ni Fudotan nga sa 961 nga kinatibuk-ang aksidente sulod sa siyam ka buwan niining tuiga 80 porsiyento niini ang settlement, 20 porsiyento ang napasakaan gyud og kaso.

Gawas niini sa hit and run 20 porsiyento ra niini ang wala masulbad o wala masakpi ang suspetsado. (BANAT NEWS)