Bombero di mohawa sa ilang building

CEBU, Philippines - Ang kadagkoan sa Bureau of Fire Protection (BFP) sa Manila supak nga papahawaon ang mga bombero gikan sa ilang building  sa Natalio Bacalso Avenue ning  dakbayan  sa Sugbo.

Kini maoy gibutyag ni Senior Superintendent Esmael Codilla, ang acting Regional Fire Marshall sa Bureau of Fire Protection dinhi sa Central Visayas.

Ang pagpapahawa sa kabomberohan gikan sa building nga ila karong nahimutangan nagumikan kay buot ni Mayor Michael Rama nga ang building  sa Natalio Bacalso Avenue nga gigamit karon sa kabomberohan gamiton nga “temporary hospital.” Ang mga structural ug civil engineer mihulagway nga ang building sa Cebu City Medical Center (CCMC) dili na luwas nga estahan og mga pasyente human sa linog niadtong Oktubre 15.

Human masayud sa pagsupak sa mga opisyal sa BJMP sa tinguha nga papahawaon ang mga bombero sa ila karong nahimutangan, si Mayor  Rama dali nga nakigtagbo sa mga bombero sa miaging   hapon.

Gipasabot sa mayor ang mga bombero nga wala siya maghuna-huna nga dili na pabalikon sa ilang opisina ang mga bombero.

Ang mga bombero giingnan sa mayor nga angayan sila nga mosakripisyo tungod ug alang sa mga masakiton nga magpatambal apan dili na makagamit sa building sa duol nga CCMC.

Miinsistir si Rama nga isip mayor siya maoy magbuot ilabi na niining panahon sa emerhensya.  (BANAT NEWS)