CEBU, Philippines - Ang Department of Social Welfare and Development sa Central Visayas (DSWD-7) naninguha nga makaabot sa lagyong lungsod sama sa Maribojoc, probinsya sa Bohol aron makapang-apod -apod og mga hinabang nga pagkaon ngadto sa mga residenteng apektado sa miaging linog.
Isip usa sa mga lungsod nga naigo sa 7.2 magnitude nga linog, ang maong dapit nabuwag kini tungod sa pagkalusno sa Abatan Bridge ug usab pagkagusbat sa kadalanan niini.
Sumala pa ni Kerwin Macopia, tigpamaba sa DSWD7 nga nahinabi sa Banat News kagahapon, ang ilang buhatan naghatod og 1, 100 ka sako nga mga pinutos nga pagkaon ug binotelyang tubig ngadto sa maong lugar.
Ila kini gikarga isakay sa usa ka bangka gikan sa Abatan River padulong ngadto sa nabuwag nga lungsod.
Dugang pa ni Macopia nga aduna usay 300 ka lain pang mga relief goods nga gihatod ngadto sa isla sa barangay Cabawan sa probinsya sa Bohol.
Samtang si DSWD-7 Regional Director Mercedita Jabagat nagkanayon nga ang mga tawo sa maong lungsod naglisod gayud sa pagpadala og text message sa ilang mga minahal sa kinabuhi tungod kay wala sila’y kuryente niadtong higayong gitay-og sila sa linog.
Mipadayag si Jabagat sa iyang dakong pasalamat ngadto sa mga nagpakabanang indibidwal kinsa mihinabang dayon sa mga biktima pinaagi sa paghatod niini ngadto mismo sa buhatan sa DSWD-7.
Gisaysay usab ni Macopia nga mibisita sila sa lungsod sa Loon kagahapon ug nakahatag sila og 1,850 ka pakete nga mga relief goods ug usab 5,000 ka botelya sa tubig nga 5.6 litros.
Gibutyag ni Macopia nga ang maong food packs nga ilang gipanghatag naglangkob sa tulo ka kilo nga bugas ug pito ka mga nagkalain-laing de lata nga pagkaon. (BANAT NEWS)