CEBU, Philippines - Nakighiusa karon ang Mandaue City Police Office (MCPO) ug buhatan sa Department of Education (DepEd) sa Mandaue City Division ngadto sa buhatan sa Commission on Election (Comelec) sa dakbayan sa Mandaue sa ilang pagpangandam alang sa kahapsay ug malinawon nga Barangay Elections.
Si Esmaelita Besabella nga maoy focal person sa DepEd alang sa 2013 barangay election nga nahinabi sa Banat News miingon nga 28 ka mga public schools sa 27 ka barangay ang magsilbing voting centers sa siyudad.
Sama sa nangaging piniliay makita ra sa mga botante ang ilang mga pangalan sa gawas sa mga polling precincts.
Ang DepEd Mandaue division miandam sa 63 ka mga election supervisors ug 63 usab ka mga support staff niini ug kapin sa 1,500 ka mga election tellers nga moabag sa mga Board of Election Inspector (BEI) nga maoy moserbisyo sa maong piniliay sa barangay.
Si Supt. Crisaleo Tolentino nga maoy deputy director for operation sa Mandaue City Police Office (MCPO) nga nahinabi sa Banat News miingon nga nakapangandam na sila sa ilang security plan sa maong adlaw. Oktubre 20 pa lang ibutang na sa full alert status ang kapolisan hangtud na kini sa liwas sa kalagkalag sa Nobiyembre 5 niining tuiga.
Hingusgan na usab ang mga checkpoint, pagdestino og ilang sakop sa buhatan sa Comelec ug pagbantay sa mga ballot boxes sa adlaw sa piniliay. (BANAT NEWS)