CEBU, Philippines - Nagtinguha si Cebu City Mayor Michael Rama nga may autonomy ang pagdumala sa Cebu City Medical Center (CCMC).
Kini aron makahimo na og kaugalingon nga desisyon ang mamunoan sa CCMC ug makapadagan sa hospital nga sama sa usa ka pribadong tambalanan.
Suma pa ni Rama nga pinaagi sa autonomiya makatigum na usab og kaugalingong pundo ang naasoy nga hospital pinaagi sa gitanyag niini nga serbisyo medical. Apan gitataw sa mayor nga ang maong lakang wala hinuon nagpasabot nga dili na magkinahanglan kini og tabang gikan sa kagamhanan sa syudad sa Sugbo.
Dugang gipasabot sa mayor nga gusto siya nga ang serbisyo sa maong hospital dili ibase sa politikanhong kabubut-on sa naglingkod nga mayor sa siyudad sa Sugbo kun dili niadtong tanang molupyo niini nga nanginahanglan og medical nga pag-atiman.
Ang medical director sa CCMC nga si Dr. Gloria Duterte nidawat usab sa hagit sa mayor sanglit ang Department of Health gipaabot nga mohatag og P50 milyones sa nahisgutang hospital.
Apan iyang gitataw nga angayan una lantawon sa kagamhanan sa siyudad ang labing gikinahanglan nga angkonong mga medical equipment sama sa CT scan ug Magnetic Resonance Imaging (MRI) ug uban pa.( /WC) (BANAT NEWS)