CEBU, Philippines - Alang sa pagpangandam sa umaabot eleksiyon sa barangay ang kapolisan sa dakbayan sa Talisay gipaubos sa orientation.
Si Senior Inspector Al Pascual, deputy chief sa Talisay City Police Station mibutyag nga ang maong kalihukan ubos sa kamanduan sa provincial headquarters.
Subay niini nagpahigayon sila og usa ka adlaw nga conference diin gilakip ang orientation ug briefing sa mga polis sa mga gimbuhaton atol sa eleksiyon.
Ang maong conference gipangulohan sa officer-in-charge sa Talisay City Police Station (TCPS) nga si Superintendent Resty Santos.
Didto kini ipahigayon sa police station ug usa sa mamumulong mao ang Comelec officer sa siyudad nga si Atty. Gallardo Escobar. Ang eleksiyon sa barangay ipahigayon unya sa Oktobre 28, 2013. Hinuon matud ni Pascual nga sa milabay’ng mga tuig walay nahitabong mga insidente sa Talisay nga naglambigit sa eleksiyon. Sa laing bahin, si Pascual miingon nga may giandam silang security plan alang sa kalinaw ug kahusay sa pista sa dakbayan karong Oktubre 15, 2013 .
Gibutyag usab ni Pascual nga sa Oktubre 14, 2013 bisperas sa pista walay bisan usa kanila ang tugotan nga mo-leave hangtud na sa Nobiyembre 1, 2013 atol sa Kalag-kalag.
Matud ni Pascual nga atol sa pista ug usab sa kalag-kalag posibleng molihuk ang mga badlongon sama sa mga kiriwan o kawatan.
Gibutyag ni Pascual nga i-grupo-grupo nila ang mga personnel ug ibutang sa mga lugar nga peligro aron mabantayan ang mga badlongon.
Gawas sa mga police personnel adunay mga multiplier force o mga Barangay Intelligence Network (BIN) ang ipakatap sa mga lugar atol sa nahisgutang mga kasaulogan. (BANAT NEWS)