CEBU, Philippines - Wala pa gihapon masweldohi ang kapin sa 30 ka mga consultant sa city hall sa syudad sa Mandaue tungod sa gipatuman nga ban sa Commission on Election ( COMELEC) niadtong midterm election sa bulan sa Mayo ning tuiga.
Sigun pa ni Atty. James Calipayan ang executive secretary ni Mandaue city mayor Jonas Cortes nga wala gilayon ma-review sa kagamhanan sa maong syudad ang appointment sa mga consultant sugod niadtong bulan sa Enero hangtud na sa bulan sa Hunyo ning tuiga.
Kini tungod kay apektado man ang appointment niini sa election ban alang sa pagpang-hire og mga trabahante sa midterm elections niadtong Mayo subay sa gipagawas sa direktiba sa Commisison on Audit (COA) nga estriktong gipatuman sa tanang mga local government units.
Niining nagsingabot nga barangay election, naapektohan na usab sa susamang election ban ang nahisgutang mga appointments. Kini ang hinungdan nga gipaagi na lamang sa evaluation ang mga piliong consultancy nga salaon sa consultancy evaluation board, Bids and Awards Committee ug sa Sangguniang Panlungsod sa dili pa kini kaaprobahan sa mayor.
Tungod niini mikabat na lamang og 21 ka mga consultant ang ilang gidawat alang sa bulan sa Hulyo ngadto na sa Disyembre human na sa ilang evaluation.
Sayo niini, ang consultant sa Urban Poor nga si Atty. Francisco Amit , miduso sa iyang resignation human sa gikatahong wala na makadawat sa iyang suholan bisan pa sa pagpunay og susi niini sa city hall sa nahisgutang syudad. (BANAT NEWS)