20 ka estudyante gisudla’g yawa

CEBU, Philippines - Mikabat sa 20 ka mga estudyante  sa  high school   sa  Quiot Integrated School sa Sitio Bogo, Barangay Quiot, dakbayan  sa Sugbo gituohang  gisudlan og  dautang espiritu  nga  nakapaaghat  sa magtutudlo  sa pagsuspenso sa ilang  klase.

Matud  pa  ang  maong mga  estudyante nagpunay  og singgit sulod  sa  classroom  sa  wala  pa  mahimong  isug  kaayo  ang  ilang  tingog. Napulo  pa  ka  mga estudyante ang nagsugod  sa pagsalimoang  kagahapon  sa buntag   apan  nasumpo  kini  sa  mga  magtutudlo nga nangadye   sa pagpanguna  sa ilang  katekista nga  si  Ms. Yap.

Si Quiot Barangay Captain Vicente Ramos Jr. namahayag  sa The Freeman   nga  sa alas 2:00 sa  hapon  dihang  ang  mga  nasudlan  sa dautang  espiritu mihiwasa  na usab,  nahimo  na silang  20   ang  tanan  nga nagtungha  sa first year  hangtud third year. Unya  nangadye  na  usab  si Ms. Yap   uban  sa  sakop  sa  Lupong  Tagapamayapa   nga  si Victor Lunday, usa ka  lay minister, ngadto sa nahisgutang  estudyante.  Matud  pa  ni Ramos   nga  naulian  ang  maong  mga  estudyante  samtang  ang  laing  tulo gidala  ngadto kang Msgr. Fred Kriekenbeek  didto  sa   Mary’s Little Children Community   sa Barangay Tabunok, Talisay City. Si Kriekenbeek  maoy  opisyal  nga  exorcist  sa Archdiocese of Cebu kinsa  maoy  nagtukod ug  amahan  nga  nagpadagan  sa  Mary’s Little Children Community.

 Matud  pa  ni  Ramos nga nagsugod  na  kaniadtong  Biyernes  pa  ang  paghasol  sa  dautang  espiritu  ngadto  sa maong  mga  estudyante  samtang  nag-camping  sulod  sa tulo  ka adlaw  ug  duha  ka  gabii  ang   mga membro  sa  Boy Scout of the Philippines (BSP) sulod  sa compound  sa maong  eskuylahan.

“Nag-campfire man na unya diha’y nagsaba-saba basin gisabaan (spirits) siguro pero natabang ra hinuon to kaganiha (yesterday) na nigrabe,” matud pa ni Ramos.

Ang  maong  insidente  nakapapugos  sa magtutudlo  sa pagsuspenso  sa ilang  klase kagahapon. Hinuon  gitakda  nga  ipadayon  ang  klase  karong  adlawa. Matud pa ni  Ramos nga ang  dagko  kaayong  punoan  sa kahoy  sama  sa  Star Apple   ug  Nangka anaa  sa  sulod  sa compound  sa maong  eskuylahan  nga  gituohan  nilang  pinuy-anan  sa mga  dautang  espiritu.

“Mga 10 to 15 years na man ning mga kahoya sukad-sukad karon lang gyud ni nga naay ingon ani nga hitabo.”

Samtang  si Kriekenbeek miingon  nga  ang  mga  demonyo mosulod  ngadto  sa  mga  makasasala ilabi  na  sa mga  dapit diin  daghan  ang  nangamatay.

Hinuon  ang  dali  kaayo  nilang  masudlan  mao   ang  kabataan tungod  sa  dagkong  sala  sa ilang  mga  ginikanan, sumala  pa niya.

Iyang gipatin-aw  nga   dili mabasul  ang  mga  kahoy  nga anaa  sa palibot  tungod  kay  inosente  sila  gawas  kun gamiton  sila  sa dautang  paagi.  (Rea Mae Y. Booc/WC)

Rama ikiha bahin sa P3M campaign funds

Usa ka abogado ang nagplano nga mopasaka og kaso batok ni Mayor Michael Rama tungod sa matud pa pagdawat og tulo ka milyon ka pesos nga campaign funds sa eleksyon kaniadtong Mayo apan wala kini giapil sa iyang list of contributions.

 Si Atty. Dodong Delute nga taga Barangay Basak-San Nicolas mitakda nga moduso sa iyang reklamo batok sa mayor adto sa opisina sa Commission on Elections (Comelec) karong buntag aron ipaimbistigar ang mayor.

 Matud ni Delute nga ang ig-agaw mismo sa mayor nga si Annabelle Rama-Gutierrez maoy mibulgar ngadto sa mga sakop sa media nga mihatag siya og tulo ka milyon ka pesos ngadto sa iyang ig-agaw nga mayor isip campaign funds. Dihang migawas kining maong isyu pinaagi mismo ni Annabelle nga nagpa-interview sa mga reporters, ang mayor wala kaayo mohatag og kumentaryo dihang interviewhon  unta  siya  sa mga tigbalita .

 Si Annabelle nakatug-an niini tungod kay nagtoo siya nga gibulsa lang ang maong salapi nga iyang gihatag isip tampo sa gasto sa eleksyon ug resulta napilde siya sa pagka kongresista.

 Nahibaw-an nga si Annabelle milansar unta pagka- kongresista sa north district dinhi sa dakbayan apan gipilde ni Kongresista Raul V. Del Mar. Sa iyang bahin, si Atty. Jose Daluz III nga campaign manager kaniadto sa Team Rama ug karon usa sa mga sinaligan sa mayor diha sa City Hall igo lang mikatawa sa maong laraw pagpasaka og kaso ni Delute.

 Matud ni Daluz nga “hearsay” ug walay lig-on nga basehanan ang kaso nga ipasaka ni Delute tungod kay gibasi lang niya kini sa media report.

 Si Daluz nagkanayon nga mahimong adunay basihanan si Delute pagpasaka og kaso kun si Annabelle Rama mopirma og affidavit kon pinanumpaang pamahayag nga mihatag siya og tulo ka milyon sa iyang ig-agaw nga mayor.

 Matud ni Daluz nga dili sila mabalaka niining maong hulga nga adunay mopasaka’g kaso sa mayor. Si Delute gikareport nga naglaraw usab paglansar pagka kapitan sa barangay Basak-San Nicolas kontra ni Kapitan George Rama sa umaabot nga barangay election.  (BANAT NEWS)