Panginabuhi sa Cordova mibalik na sa normal

CEBU, Philippines - Gipahimutang  na  sa normal ang mga  lihok sa Inter-Agency Crisis Management Team (IACMT) nga gipangunahan ni Gobernador Hilario Davide III, 20 diyas human  sa pagkalunod sa MV St. Thomas Aquinas  sa kadagatan  sa dakbayan  sa Talisay.

Naugmad  kini  atol sa command  conference  nga gipahigayon  uban  sa nagkalainlaing ahensya  sa goberno ug  pribado  nga  miatubang  sa maong krisis didto sa Kapitolyo  kagahapon.

Si Calvin Rosellosa, area manager sa 2GO  Group nagkanayon  nga  mibalik  na  sa normal  nilang panginabuhi  sa dagat  ang  mga  molupyo sa lungsod  sa Cordova.

Kini  tungod  kay nasuta  nila  nga wala  nay  mga asayte ang lawas  sa mga  lambay nga ilang  nakuha  sa dagat.

Sumala  ni  Dr. Frank Laruelle, technical team manager  sa International Tankers Oil Pollution Federation (ITOPF),  nga  ang  suliran  sa pagkatap  sa asayte  dili  na bug-at  kay  mikapin na  sa katunga  ang nakuha  niini gikan  sa kadagatan.

Ang  ITOPF  maoy gihangyo  sa   2GO Group Inc, nga maoy  tag-iya  sa barko  nga  nalunod,  nga  motabang  sa pagkuha  sa asayte  nga  mibanaw  sa kadagatan  sa Sugbo. Gani  bisan si Angelito Salvio, ang assistant vice president sa 2GO nagkanayon  nga  bisan  ang  kasko  sa Aquinas  limpyo  na  ug  wala  nay asayte.

Gumikan  niini  nahaw-as  gikan  sa kalisud ang  mga apektadong  molupyo  sa lungsod  sa Cordova, sumala  ni Salvio. (BANAT NEWS)