Kapitolyo nagplano sa pagpatrabaho sa simbahan sa Sibonga

CEBU, Philippines — Si Gobernador Gwendolyn Garcia sa Probinsiya sa Sugbo nagplano nga mahinabi ang opisyales sa Archdiocese of Cebu nga gipangulohan ni Arsobispo Jose Palma alang sa tinguha sa Kapitolyo nga mao ang mopatrabaho sa naguba nga Our Lady of Pilar Parish sa Lungsod sa Sibonga.

Si Garcia nidesisyon nga ang Probinsiya sa Sugbo na lang ang mogasto alang sa restoration sa maong simbahan.

Nasayran nga ang maong simbahan grabe ang kadaot niini gumikan sa bagyong Odette.

Si Garcia niluwat sa maong tanyag human sa kalangay sa Tourism Infrastructure and Enterprise Zone Authority (TIEZA) nga maoy unang nisaad nga mopaayo sa maong simbahan.

Gawas niini, wala usab nakauyon ang gobernadora sa plano sa consultancy firm nga gikuha sa TIEZA aron nga maoy moplano kon unsaon pagbalik sa karaan nga hitsura ang maong simbahan.

Ang consultant nga gikuha sa TIEZA nipresentar sa plano niini sa maong simbahan  diin apil sa pagbutang og arko ug wala makauyon niini si Garcia.

"They are going to put mga archs nga matabonan ang mga murals nga naa sa ceiling nga more than a hundred years old, ngano man? To justify the increase kay instead of .. mga hundred kapin naman nuon ang gastohonon. Unya papirmahon ko sa ilang plano", padayag ni Garcia.

Matud ni Garcia nga anaa ra sa mga P40 milyones ang ilang pagkwenta sa magasto apan nasayran na lang nila nga moabot na sa P110 milyones ang kinahanglan nga pundo alang sa restoration process nga himuon sa simbahan.

Gikwestiyon ni Garcia ang planong pagbutang og arko nga iyang gihulagway foreign object sa simbahan o wala sa orihinal nga istraktura.

Matud usab ni Garcia nga dili renovation apan restoration ang angay himuon sa simbahan.

Gibutyag ni Garcia nga ang TIEZA nibayad og P5 milyones sa maong consultancy firm.

Si Garcia nagkanayon nga buot niya nga mahinabi ang opisyales sa archdiocese kalabot sa plano sa Kapitolyo aron adunay koordinasyon ug pagtugot sa archdiocese.

"I need to be in agreement with Archdiosce. Total gi-declare naman na nga heritage site, we can spend government fund on that", dugang ni Garcia. — /BDB (BANAT NEWS)