CEBU, Philippines - Usa ka konsehal ug usa ka molupyo sa barangay nasikop sa kapolisan kay nasakpan sa akto nga nangisyu og numero sa masiao didto sa barangay Tagnucan, lungsod sa Borbon sa alas 6:30 sa miaging gabii.
Sumala sa record sa Cebu Provincial Police Office (CPPO) ang mga suspetsado nailhan nga si Feliciana Doldol Quimque, 56 , minyo, ug usa ka barangay kagawad sa barangay Tagnucan ug ang silingan niini nga si Felisa Bontol Bragat, biyuda, taga sitio Punta, barangay Tagnucan
Ang rekord sa CPPO nagbutyag nga nagpatrolya ang kapolisan nga sila si PO1 Jeffrey Lequin ug PO1 Benice John Paul Armero sa Borbon Police Station sa maong higayon dihang nasigpatan niini ang mga suspek nga nangisyu og numero sa masiao. Diha-diha ila kining gisikop aron pagpaila sa dako nilang kalapasan sa balaod.
Nasakmit gikan kang Quimque ang usa ka stub nga may mga kombinasyon sa numero, kwarta nga mokabat sa P120 ug duha ka tip sheet nga may marka nga SPEED.
Samtang si Bragat nakuhaan usab og SPEED tip sheet , tulo ka stub nga may mga kombinasyon nga numero, ball pen, ug kuwarta nga mokabat og P504.
Ang duha gitanggong karon sa Tabogon Police Station. (BANAT NEWS)