Ang Banat News sa mosunod nga katuigan

CEBU, Philippines - Gisaulog na karong adlawa ang ika-19 ka tuig nga anibersaryo sa paborito ninyo nga mantalaan, ang Banat News mas ampingan pa namo gikahimutangan karon isip nag-unang pamantalaang Bisaya dinhi sa Central Visayas.

Mapaabot sa publiko ang mas dekalidad nga mga balita ug kasayuran, kalingawan, ug mga estorya nga sarang kapanaminan ug kakutluan og pagtulun-an.

Mga panghitabo sa atong palibot ang dali nga respondehan sa mga reporters ug correspondents sa Banat News ug mosamot pa gyud kini kalig-on gumikan kay gidugangan man ang puwersa niini.

Bisan unsa pa ka layo sa mga nahitaboan, paningkamotan gyud sa Banat News nga mapadalhan og reporters aron lang gyud mahatud sa katawhan ang kompleto nga detalye.

Ang Banat News maoy nag-una sa mga awards sa natad sa paghatud kaninyo sa mga kompleto, komprehensibo ug kasaligang mga balita ug impormasyon sama nalang sa Best in Investigative Reporting ug Best in News Stories sulod na sa upat ka tuig sa gipahigayong Cebu Catholic Mass Media Awards (CAMMA).

Kung abtik ang pagtunol sa mga nahitabo sa palibot, ingon ani usab ang kaabtik ang Banat News sa pagsaysay sa mga lab-as nga balita sa showbiz pinaagi sa Banat Hugyaw.

Nagpunsisok nga mga balitang artista ang mabasa sa Hugyaw, busa paborito kini sa mga tawo nga gusto ma-relax ug gustong masayod sa mga kasikas sa ilang mga giidolo nga artista.

Ang nakanindot sa Hugyaw, gawas sa mga artista sa national, mo-feature usab kini sa Cebu entertainment scene hinungdan nga gipangga gyud ang Banat News sa masa.

Nagpabilin nga mabasa sa mga Sugbuanon  matag adlaw nga Lunes, ang section nga Tingusbawan kung diin nakahatag kini og inspirasyon sa mga tawo nga gusto magmalampuson sa ilang kinabuhi.

Kahinumduman nga pipila sa mga artikulo niadto sa Tingusbawan ang nakadawat na og mga pasidungog ilabi na sa Cebu Catholic Mass Media Awards (CAMMA).

Kini ang section sa kalampusan ug kalambuan nga natagamtaman sa atong kinabuhi, kabus man o adunahan, nga naningkamot aron ug may determinasyon uban sa hugot nga pagsalig sa Kahitas-an.

Dinhi makakuha og tips ang bumabasa sa mga simple nga negosyo, mga pamaagi, ug kamahoan nga nakapadato sa uban o ba kaha nahimong sinugdanan sa kalamposan sa usa ka tawo.

Balanse ang pagtunol sa Banat News og impormasyon, busa nihatag usab kini og luna alang sa sektor sa transportasyon nga mao ang Banat Manobela. Nasayran nga naghupot usab og dakong papel sa kalambuan sa komunidad ang sektor sa transportasyon.

Mabasa gihapon matag Domingo ang  segment nga “Banat In” kung diin alang kini sa mga tawo nga gusto masayod sa latest fashion apan minos lang ang gasto.

Diha usab sa maong section mabasa ang recipe sa mga lamian nga pagkaon apan dili bug-at sa bulsa. Motunol usab kini sa impormasyon alang sa maayong panglawas.

Samtang dunay panultihon nga "the only permanent thing in this world is change." Mao nga ang Banat Sports dili magpanuko sa paghimo og mga kausaban karong mosunod nga mga katuigan.

Mapaabot ang mas nindot ug maundanon pang sports section ilabi na ang coverage sa local sports scenes aron mahatagan og espasyo ang lokal natong mga atleta sa atong mantalaan. Tutukan sa Banat Sports ang barangay sports o kadtong mga gagmay’ng liga.

Palawman pa ang pagkuha ug pagpagawas og mga dagkung balita  sa  paugnat sa kusog dinhi sa Sugbu ilabi na nga nahimo na kining usa sa mga Sports City sa Pilipinas sa pagsulod sa mga dagkung torneyo.

May mga kausaban nga pagahimuon ang mga sakop sa Banat News sports section, kini mao ang  pagpagawas sa Sports Trivia matag adlaw nga  mohatag og dugang impormasyon sa mga sports fans. Paninduton pa  ang mga minugbong sports stories sama sa PASBREK, NBA Bits ug Blow-by-Blow.

Maisip ang usa ka larawan o picture nga usa sa labing mahinungdanong elemento sa paghatod sa sports stories nga maoy mopakita sa unod ug emosyon sa sports event.

Sa nagkalambo nga kalibotan sa paugnat sa kusog, dungan usab nga mosakay ang Banat Sports sa mga bag-ong sports nga hinay-hinay nga misulbong karon sama sa triathlon, Mixed Martial Arts ug Football ug Rugby.

Mao kini ang mga pipila sa mga kausaban nga among nahuna-hunaan aron among ikadalit sa mga suking tigbasahan sa Banat News sa Central, Eastern ug Western Visayas ingon man sa pipila ka mga probinsya sa Mindanao samtang among gipangandaman pinaagi niining ika-19 nga anibersaryo karong Agosto 23, 2013 ang atong ika-20 ka tuig nga adlaw’ng natawhan. Happy 19th birthday, BANAT News.  Mabuhi kitang tanan! (EIM)(BANAT NEWS)