CEBU, Philippines - Nagpakamatay ang usa ka ulitawo pinaagi sa long sleeve sa senina nga gihikot sa iyang liog gumikan sa kaguol nga gikasab-an sa iyang inahan didto sa barangay Sta Cruz sa lungsod sa Balamban sa miaging kaadlawon.
Ang nagpakamatay mao si Jimboy Vasquez, 20 , ulitawo ug nagpuyo sa maong lugar.
Si SPO1 Jose Renielito Villarino sa Balamban Police Station mibutyag sa Banat News nga ang biktima gikasab-an sa iyang inahan sayo nianang gabhiona.
Apan human niadto naghinuktok ang biktima ug milakaw kini.
Nianang pagka-alas 12:00 sa tungang gabii gisusi sa ginikanan ang iyang higdaanan apan wala kini didto.
Ila kining gipangita ug sa pag-adto nila sa comfort room didto nila kini hikit-i nga nagbitay na ang biktima ug wala nay kinabuhi.
Didto nila masud-ong ang usa ka bukton sa long sleeve nga gigaid sa sagbayan sa balay ug ang laing bukton niini maoy gihikot sa liog sa biktima.
Ang mga ginikanan kombinsido nga naghikog ang biktima ug wala sila’y pagduda sa foul play tungod kay luoran gyud kini ilabina kun kasab-an o ba kaha maymayan. (BANAT NEWS)