CEBU, Philippines - Ang Commission on Audit (COA) miawhag g’yud ni Mayor Michael Rama nga tumanon ang balaud nga matag tulo ka tuig kinahanglang usbon ang tax rate alang sa mga yuta ug building.
Matud ni Delia Monte de Ramos, ang cluster director sa COA alang sa local government units, nga siyam na ka tuig nga walay gihimong revision sa tax rates sa real properties ang dakbayan.
Si City Assessor Eustaquio Cesa nangatarungan ngadto sa mga opisyal sa COA nga walay mga konsehal nga adunay igong kaisog pagduso og general revision sa tax rates, ilabi na kun magsingabot ang eleksyon.
Ang tax rates sa mga yuta, building ug makinarya angay na unta nga himoan og revision kun kausaban niadtong 2006 apan walay mga konsehal nga may kaisog sa pagsugyot niini kay nagsingabot ang eleksyon sa 2007.
Pagka 2009, tangkud na usab unta nga tulo ka tuig ug angay na usab nga mohimo og tax revision apan nagsingabot na ‘sab ang eleksyon pagka sunod tuig.
Ingon usab niini ang nahitabo sa miaging tuig nga wala gihapo’y kaisog ang mga opisyal bisan si Mayor Michael Rama nga himoan og revision ang buhis kay eleksyon man kaniadtong Mayo.
Matud ni Delia Monte de Ramos, cluster director for local government sa COA, nga kun gihimo pa sa dakbayan ang revision sa tax rates sa mga real properties, nakakolekta unta og daku ang City Hall.
Si Mayor Rama hinoon miingon nga adunay laing paagi sa pagkolekta og daghang buhis ug kini mao ang paghingusog sa tax collection diin kadtong mga delinquent taxpayers pugson sa pagpabayad.
Nabantayan ‘sab sa COA nga ang City Hall wala usab moplastada sa ngalan sa mga magbubuhis nga wala mobayad sa ilang obligasyon ug pinaagi niini mapugos na sila sa pagbayad. WC (BANAT NEWS)