CEBU, Philippines - Grabeng problema sa trapiko ang nasinati sa mga motorista samtang liboang mga pasahero ang nangatanggong sa kadalanan atol sa usa ka kalihukan sa mga sakop sa Iglesia Ni Cristo (INC) diha sa South Road Properties sa miaging adlaw nga Biyernes.
Ang maong kalihokan kabahin sa ilang anibersaryo diin liboan sa ilang mga miyembro ug dili mga miyembro ang mitambong nga nakamugna gyud og grabeng problema sa mga sumasakay sa lainlaing dapit sa dakbayan ug probinsya sa Sugbo.
Ang maong mga problema mitumaw gihapon bisan pa man sa pagpangandam sa mga awtoridad pinaagi sa pagpahibalo sa publiko bahin sa re-routing ug sa mga alternatibo nilang kalutsan padung sa SRP.
Apan ang labing naapektahan mao ang mga sumasakay nga walay kalabotan sa maong kalihukan ilabi na niadtong mga gikan sa lagyong dapit ug kadtong mga gikan pa sa trabaho. Kini gumikan sa 245 ka public utility vehicles ang giabangan sa INC aron hakuton ang ilang mga miyembro padulong sa South Road Properties.
Matud ni Ahmed Cuizon, regional director sa Land Transportation Franchising and Regulatory Board (LTFRB), nga 130 ka bus ug 115 ka passenger jeepneys ang gihatagan nila og special permit kay gigamit kini sa kalihukan sa INC.
Ang mga bus ug PUJ nga puno sa mga sakop sa INC gikan sa lainlaing dapit sa dakbayan ug kalungsoran sa Sugbo gitugotan nga makasulod sa SRP aron ihatud sila sa dapit nga didto gihimo ang kalihukan.
Alas-9 sa buntag hangtud sa alas-10 sa gabii gitak-opan ang Mambaling access road paingon sa SRP gawas lang sa mga sakyanan nga sakop sa INC nga adto mo-parking ug motambong sa kalihukan.
Diha pa lang sa may Arellano Blvd. bumper to bumper na ang mga sakyanan nga buot moagi sa tunnel, susamang eksena usab ang makita diha sa lutsanan sa may MJ Cuenco ug D.Jakosalem ug uban pang access roads padung sa South Coastal Road.
Bisan og ang mga sakop sa INC wala mosuporta sa Team Rama sa miaging eleksyon, apan si Mayor Michael Rama miingon nga gisuportahan nila ang kalihukan sa INC.
Matud ni CITOM Executive Director Rafael Christopher Yap nga mga 50 ka traffic enforcers ang ilang gidestino aron makatabang nga mapahapsay ang kalihukan sa INC.
Samtang 200 usab ka mga polis sa Cebu City Police Office ang gipakatap sa maong event aron pagmentinar sa kahapsay ug kalinaw sa dapit. Gipasabot ni Yap nga bentaha na lang nga ang INC nga diha mipahigayon sa ilang kalihukan sa SRP kay sa miaging tuig nga didto nila gihimo sa Fuente Osmeña. (BANAT NEWS)