CEBU, Philippines - Unom ka mga suspek, upat niini menor de edad, ang nagtingkagol karon sa karsel sa Tabuelan Police Station human manglungkab sa tindahan sa usa ka konsehal sa Barangay Poblacion sa miaging adlaw. Ang suspek nga si John Clyde Pude, 20, giingong mikuha sa halin nga P6,250 sa tindahan nga gipanag-iya ni Konsehal Silvestre Momo, 68. Gawas ni Pude, naaresto usab si Junrey Lampago, 18, lakip na ang duha ka 16 anyos ug laing duha ka 15 anyos nga pulos taga Barangay Poblacion. Ang grupo nabisto human makamata ang katabang nga si Flor Mondejar, 43, tungod sa kagay sa mga sinsilyo. Si Momo nga daling mikanaog ug didto nakit-an ang suspek nga miresulta sa nilayugay ug nakasamad sa kilay sa konsehal samtang ang asawa niini nga si Larena, 62, naumod human gitukmod sa suspek nga daling misibat sa tindahan. Apan sa hot pursuit operation nasikop sa kapulisan si Pude samtang ang laing lima boluntaryong mitahan sa Tabuelan Police Station. (/EIM) (BANAT NEWS)