CEBU, Philippines - Gitigom sa bag-ong CITOM board chairman Ruben Almendras ang iyang mga kawani sa labing unang higayon niadtong Byernes.
Si Almendras bag-ohay pa lang gitudlo ni re-elected Cebu City Mayor Michael Rama nga maoy mangulo sa City Traffic Operations Management kon CITOM isip hulip ni Jack Jakosalem kinsa mi-resign human milansar sa pagka-konsehal ubos sa Team Rama.
Matud ni Executive Director Atty. Rafael Yap, si Almendras nakigkita sa mga opisyal sa CITOM aron hisgutan ang iyang umaabot nga paglingkod.
Gitan-aw usab sa bag-ong opisyal sa city hall ang SCATS control room.
Ang SCATS kon Sydney Coordinated Adaptive Traffic System mao ang gigamit sa dakbayan nga sistema sa pag-operate sa traffic lights.
Gawas niini, si Almendras usab giingong nangayo og kopya sa mga papeles nga kinahanglan niyang tun-an sa dili pa hingpit nga mangulo sa CITOM. Lakip sa gipangayo ni Almendras ang mga ordinansa nga nagpalihok sa ilang opisina, organizational structure ingon man ang proposed budget.
Gibutyag usab sa igsoon ni bise gobernador ug kanhi pangulo sa Metropolitan Cebu Water District (MCWD) ang iyang mga plano, programa ug mga polisiya nga gusto niyang kab-uton ug buhaton sa CITOM ubos sa iyang pagdala. (BANAT NEWS)