Nigerian drug suspect wala moangkon sa iyang kapuyo
CEBU, Philippines - Nigerian nga nadakpan tungod sa pagpamaligya og shabu diha sa North Reclamation Area sa siyudad sa Mandaue wala moangkon sa babayeng Filipina nga iyang kapuyo.
Nagtingkagol na karun sa Mandaue City Jail si James Okwudili Uyanneh kinsa nadakpan niadtong Martes sa gabii sud sa motel duol sa North Reclamation Area tungod sa pagpamaligya og ginadiling druga.
Si Uyanneh dihang gihinabi sa mga tigbalita kabahin kang Susan Santillan kusganon siyang mihimakak nga managkaila silang duha.
Iyaha usab gi-deny nga nakapuyo siya kaniadto sa Yati, Liloan uban sa banay’ng Santillan.
Si Susan mao ang naabtan sa NBI diha sa ilang balay sa barangay Guadalupe sa dakbayan sa Sugbu niadtong Miyerkules usa ka adlaw human madakpi si Uyanneh nga nakuhaan og balor P350,000 nga gituohang shabu.
Si Santillan mibutyag nga wala siya makahibalo sa binuhatan ni Uyanneh ilabi na sa pagpamaligya niini og shabu, samtang iyang gibutyag nga tulo ka tuig na silang nagpuyo sa suspek apan secretive kini kaniya.
Si Santillan adunay unom ka mga anak sa unang bana nga Amerkano kinsa namatay na, apan wala silay anak ni Uyanneh. Si Santillan usab ang boluntaryong mitunol sa NBI sa maletang dili gustong pahilabtan kaniya ni Uyanneh, diha sa maong maleta nadiskubrehan ang balor P3.5 milyones nga shabu.
Si Atty. Bernard dela Cruz sa NBI miingon nga gi-waived ni Uyanneh ang iyang katungod sa pagtubag sa ilang kasong gipasaka.Way piyansang gihatag kang Uyanneh. Si Uyanneh pabiling mihimakak nga iya ang maong mga shabu. (/EIM) (BANAT NEWS)
- Latest
