CEBU, Philippines - Miasumer isip bag-ong presidente sa Association of Barangay Council (ABC) sa dakbayan sa Lapulapu si Kapitan Jose Dungog sa barangay Gun-ob, Lapulapu.
Siya maoy mihulip ni kanhi ABC President Leo Mercado kinsa milingkod na isip konsehal sa dakbayan human kini mudaog sa eleksyon niadtong Mayo 13, 2013.
Si Dungog molingkod usab nga ex-officio member sa Lapulapu City Council.
Kaniadto si Dungog kinsa ABC treasurer miingon nga naanad na siya sa maong katungdanan busa wala siya mabalaka niini.
Ang iyang bise presidente karon mao si Kapitan Joseph Pangatungan sa barangay Maribago.
Ang kanhi bise president sa ABC nga si Kapitan Elias “Dongdong†Berdin sa Babag, kinsa midaug usab sa pagka-konsehal sa dakbayan, milingkod na sa konseho uban ni Mercado.
Hinuon si Dungog molungtad lamang sa maong katungdanan hangtud karong Oktubre ning tuiga.
Kini tungod kay mausab man ang dagan sa mangatungdanan sa barangay human sa piniliay sa barangay sa maong buwan.
Sa pagkakaron ang nangatungdanan sa ABC sa Lapulapu mao sila Mario Inot, isip auditor, Johnita Amorin, secretary, Lourdes Ibag, treasurer, Mateo Dungog, Lauro Soroño, Ferdinand Cahilog, Tranquilino Omolon Jr., Jimmy Ybañez, Evaresto Dibayo Jr., nga maoy mga sakop sa board of directors.
Sila si Domeo Matbagon, Virgelio Casio, Virgelio Dano, Lucrecia Amores, ug Nestor Paypay nga maoy mga gitawag nga sakop sa council of elders sa kabarangayan sa maong dakbayan. (BANAT NEWS)