Operasyon sa video karera sa pasil ug suba iparonda ni Rama

CEBU, Philippines - Gimandoan na ni Mayor Michael Rama ang hepe sa Cebu City Police Office nga si Senior Superintendent Mariano Natuel nga rondahon ang mga video karera operation diha sa Barangay Pasil ug Suba. Ang mga sakop sa media maoy mi-report ngadto ni Rama nga hinay-hinay nang namalik ang operasyon sa video karera apan panahon ra sa gabii.

Matud ni Rama nga tigumon niya ang kadagkoan sa kapolisan aron himoan og aksyon ang report nga iyang nadawat.

Ang report nga miabot sa media nagkanayon nga ang mga sakop sa San Nicolas Police Station wala mohimo’g aksyon sa kalihukan sa mga operator sa video karera.

Si Rama nagkanayon nga ipasusi usab niya sa iyang mga tigpaniid kun ang video karera naglihok na ba pagbalik sa ubang mga barangay.

 Ang kalihukan sa mga video karera sa Sugbo napitol dungan sa paglingkod sa katungdanan ni DILG Secretary Mar Roxas nga mimando g’yud sa kapolisan ug hugtanay nga kampanya sa illegal nga sugal.

Duha ka opisyal sa Suba ug Pasil mitug-an nga human mangundang ang ubang video karera operators, dunay laing mipuli sa ilang negosyo ug nakigkunsabo sa kapolisan aron dili hilabtan ang ilang illegal nga sugalan. (BANAT NEWS)