CEBU, Philippines - Pito ka mga panimalay sa duha ka mga barangay ang naguba human kini ilampurnas sa unos dungan ang pagbunok sa uwan didto sa lungsod sa Dumanjug niadtong Martes sa alas 12:43 sa hapon.
Hinuon alas 5:00 pasado na sa hapon kini na-report sa buhatan sa kapolisan sa lungsod.
Ang mga apektado nga barangay naglakip sa barangay Tangil ug ang barangay Canyuko sa maong lungsod.
Si PO2 Irish Buena sa Dumanjug Police Station mibutyag sa Banat News nga ang mga nagpakabanang molupyo sa maong lugar maoy mipahibawo sa namugna nga kadaut human sa maong unos nga gidunganan sa pagbunok sa kusog nga uwan nga giubanan og hangin nga kusog.
Si PO2 Buena miila sa mga tag-iya sa lima ka mga panimalay nga gipangguba sa maong unos sa barangay Canyuko nga mao sila si Lizel Tomaquil, 50, minyo, Gemma Alejandro, 39, biyuda, Lotidi Masculado, 55, Graciano Balucos, 82, ug Nicolas Betio, 50, minyo.
Samtang ang duha ka balay nga naguba usab sa barangay Tangil gipanag-iya nila ni Marilou Arnado, 49, minyo ug Rufina Dupal-ag, 50, minyo.
Si PO2 Buena miingon nga dili kaayo kusog ang ulan sa tibuok adlaw niadtong tungora apan nianang pagka-udto mikalit lang og bundak ang kusog nga uwan dala ang hangin nga maoy nakaguba sa balay nga gihulagway.
Hinuon giingon kining mga balay nga naguba pulos ginama sa mga gaan nga materyales.
Ang mga tinugyanan sa Social Welfare office nga gipangulohan sa social worker nga si Luzvimenda Melegrito sa lungsod uban ang mga local nga opisyal, inabagan sa kapolisan nagtambayayong sa pagsusi sa mga apektadong panimalay.
Giasikaso na karon sa social welfare sa l ungsod ang posibling mahatag nga ayuda sa mga apektadong pamilya. (BANAT NEWS)