CEBU, Philippines - Usa ka motorista ang nasampolan sa bag-ong balaod sa pagsuot og saktong standard safety helmet human gipasaka sa Provincial Prosecutor's Office ngadto sa korte ang labing unang kaso may labot niini.
Ang buhatan ni Provincial Prosecutor Pepita Jane Petralba misang-at sa kasong violation of Republic Act 10054 nga naila nga Motorcycle Helmet Act of 2009 batok sa usa ka Chris Rapel Sarco Talaba taga lungsod sa Liloan kinsa gitanggong sa kapolisan sa lungsod sa Consolacion.
Nasayran nga ang maong akusado kusog nagpadagan luwan sa iyang Suzuki Smash 110 nga may plate number 7TC-R-7479 niadtong Hunyo 26, 2013 sa alas 5:50 ang takna sa hapon nga wala magsul-ob sa standard nga motorcycle helmet didto sa highway sa utlanan sa lungsod sa Liloan ug sa lungsod sa Consolacion.
Siya gisikop sa police checkpoint sa lungsod sa Consolacion nga gipangulohan ni PO1 Alberto Jimenez tungod sa wala pagtuman sa Motorcycle Helmet Act 2009.
Ang provincial prosecutors office miingon nga multa ra nga P1,500 ang silot sa unang kalapasan sa maong balaod.
Samtang P3 mil ang multa sa ikaduhang kalapasan, P5 mil sa ikatulo ug P10 mil nga multa ug pagkanselar sa driver's license ang silot sa ika-upat nga kalapasan. (BANAT NEWS)