CEBU, Philippines - Gi-oktaba sa Bureau of Internal Revenue (BIR) ang gitakda niining deadline sa pagpatuman sa bag-ong resibo.
Gipahibalo sa ahensya nga mahimo pang gamiton sa mga establisamento ang ilang mga daang official receipts hangtud Agosto 30 ning tuiga tungod usab sa hangyo sa daghang mga negosyante.
Gipasabot ni BIR Chief Kim Henares, nga giuswag nila ang deadline aron kahatagan og igong panahon ang mga negosyante nga makapa-imprinta og mga bag-ong receipt form.
Gitumbok pa niya nga adunay 2,000 ka accredited printers ang BIR sa tibuok nasud nga mahimong adtuon sa mga negosyante.
Kahinumdoman nga sa gipagawas nga BIR regulations, ang mga daang resibo mahimo na lamang magamit hangtud Hunyo 30, 2013.
Una nang gipahayag ni Sergio Ortiz-Luis, presidente sa Philippine Exporters Confederation (Philexport) ug opisyal usab sa Philippine Chamber of Commerce and Industry (PCCI) nga kadaghanan sa mga negosyo sa nasud dili pa andam sa pagpatuman sa implementasyon sa Revenue Regulations No. 18-2012. (BANAT NEWS)