Nadat-ugan sa nalimbuwad nga sakyanan angol

CEBU, Philippines - Naangol ang pasahero sa traysikad   human dat-ogi   sa nalimbuwad nga sakyanan sa dalan Ouano Avenue sa reclamation area sa dakbayan sa Mandaue   kagahapon  sa alas 5:00 pasado ang takna  sa buntag.

Si SPO4 Apolinario Niez, imbestigador sa  traffic division sa Mandaue City Police Office (MCP0) miila sa biktima  nga mao si Elsa Manatad, 67,  taga sitio Sta. Cruz, barangay Guizo, dakbayan sa Mandaue.

Dugang pa niya   nga  si Renato Lanoy, 36, minyo,  nga taga barangay Centro sa maong dakbayan,   maoy  nagmaneho  sa traysikad  lakip usab   nga naangol ug gidala sa Mandaue City District Hospital.

Si SPO4 Niez miingon nga ang Kia nga sakyanan nga nagdala sa plate number YJN 823  ang gimaneho usab sa usa ka babaye nga si Kristel Cuizon, 22, nga taga Hill Top Subdivision sa barangay Nangka, lungsod sa Consolacion .

Kauban  usab  niya  sila si Kiven Oscar Sodilla ug Dailand Ever Baguio nga pulos hingkod ang panuigon nga taga Ceres, Gun-ob, dakbayan sa Lapulapu.

Matud pa ni SPO4 Niez nga sa ilang imbestigasyon   gikang  nagbilar sa namatay nilang higala  sa dakbayan sa Sugbo  sila  si Cuizon  ug  mga  kauban.

Sa ilang pag-abot  sa maong dapit,  usa ka wala hiilhing tawo nga kalit lang milabang sa dalan  ug  dihang  giyatakan  ang  preno, nabangga kini sa center island ug poste sa maong lugar hangtod nga nalimbuwad.

Ang traysikad nga nahiagi usab sa maong lugar lakip sa naigo sa maong sakyanan nalimbuwad  usab nga maoy nakaingon sa pagkaangol sa  pasahero niining si Manatad  ug  ang  drayber  nga  si     Lanoy.

Ang mga biktima nga naangol dali nga gidala ngadto sa Mandaue City Hospital, samtang si Cuizon nga wala makasinati og kadaut sa iyang kalawasan ang mitahan usab ngadto sa kapolisan. (BANAT NEWS)