Nagdala og pusil sikop sa checkpoint
CEBU, Philippines - Nagtingkagol sa Talisay City detention cell ang usa ka 27-anyos nga lalaki human kini masakping nagdala og pusil atol sa gipahigayong checkpoint sa kapolisan niadtong Sabado sa gabii diha sa sitio Dawis, barangay Tabunok, dakbayan sa Talisay.
Ang suspetsado giila sa mga polis nga si Ricthie Daan, taga barangay Tanke sa nahisgutang siyudad.
Naimbargo sa mga polis gikan sa posisyon ni Daan ang usa ka kalibre .45 nga pistola nga dunay unom ka buhing bala sa magazine niini. Ang maong pusil gisulod kini ni Daan sa usa ka kolor itom nga belt bag.
Si PO1 Joel Lopez, duty desk officer sa Talisay City Police Station mibutyag nga si Senior Inspector Allan Cuizon ang nangulo sa checkpoint.
Si Daan nagsakay kini og motorsiklo ug dihang nakita ang mga polis nga nag-checkpoint dali kining miliko sa iyang motorsiklo balik sa iyang agi apan gidemalas tungod kay sa iyang padali-dali ang suspetsado giingong nabangga kini sa gutter diha sa karsada ug natumba hinungdan nga nakaangkon kini og mga pangos.
Daling gitabang sa mga polis ang suspetsado apan sa pagrekisa sa mga polis ngadto kaniya na-recover ang maong pusil.
Si Daan mag-atubang og kasong illegal possession of firearms ug kalapasan sa Comelec gun ban.
Ang Comelec gun ban malibkas kini karon pang Hunyo 30, 2013. (BANAT NEWS)
- Latest
