6 ka paketeng shabu sakmit ug priso usab ang suspek
CEBU, Philippines - Nasakmit ang 6 ka pakete nga gidiling drugas, gikan sa usa ka illegal drug pusher kinsa nasikop sa kapolisan sa City Intelligence Branch(CIB) sa dakbayan sa Mandaue sa Brgy. Guizo, sa maong dakbayan sa miaging buntag.
Si Joseph Basilgo, 40, ug residente sa Sitio Santo Niño sa brgy. Guizo, ang temporaryong gitanggong sa detention cell sa Subangdaku Police Station human kini siya masikop.
Ang suspek nasikop human motawag og polis ang usa ka concerned citizen sa maong barangay kalabot sa iyang nasinatian sa suspetsado.
Mipahigayon gilayon og buy-bust operation ang kapolisan ug migamit sa P300 isip marked money nga maoy gitunol sa poseur buyer ngadto sa suspetsado ug sa dihang nahitabo na ang pagbinayloay sa illegal nga drugas ug kwarta gisikop gilayon ang suspetsado.
Unom ka gagmay’ng pakete sa shabu ang nakuha sa suspetsado lakip ang P300 nga marked money diin ang nahisgutang mga ebidensya maoy gidala ngadto sa PNP Crime laboratory.
Si City Intelligence Chief P/Insp.Philipp Silva nagkanayon nga dugay na nilang gipanid-an ang maong suspek human sila makadawat og report nga aduna kini police protector apan atol sa interogasyon gihimakak kini sa suspek ug nagkanayon nga aduna lamang siya’y mga silingang polis.
Nasayran usab nga usa ka ginganlan og “Piloto†nga taga Mambaling dakbayan sa Sugbo, ang tig-supply sa suspek sa nahisgutang illegal mga drugas.
Kasong illegal possession ug pagpamaligya sa illegal nga drugas ang ipasaka batok sa suspetsado nga kasamtangang gitanggong sa Subangdaku Police Station. (BANAT NEWS)
- Latest
