CEBU, Philippines - Si Cebu City Administrator Jose Marie Poblete gusto nga ang kontrobersyal nga isyu bahin sa pagtukod og koral sa Cebu Port Authority (CPA) nga wala’y pagtugot sa Office of the Building Officials (OBO) masulbad ra nga malinawon.
Hangtud karon wala pa gayud ipatuman ni Poblete ang kamandoan ni Mayor Michael Rama nga pangibton ang maong koral nga puthaw nga gipabarug sa CPA diha sa luna nga ilang giangkon duol sa karaang Compania Maritima building.
Gani mibahad pa si Rama nga kun dili mopatuman ang iyang mga sakop sa iyang kamandoan mahimo siya ang mangunay sa pagpangibot sa maong mga koral nga puthaw.
Si Poblete miingon nga ang wala niya pagtuman dayon sa kamandoan sa mayor wala magpasabot nga wala siya’y pagtahud ni Mayor Rama apan gusto lang niya nga masulbad ang isyu nga dili masilo ang kabubut-on sa mga opisyal sa CPA.
Gani matud ni Rama nga aduna sila’y hilom nga negosasyon tali sa mga opisyal sa CPA pinaagi ni Atty. Yusop Uckung nga maoy chief legal officer sa CPA. (BANAT NEWS)