CCCI di maka-refund sa ilang P3 milyones nga gastos sa Cebu Business Month

CEBU, Philippines - Gibalibaran sa Committee on Budget and Finance sa Cebu City Council ang sugyot sa duha ka konsehal nga ang P3 milyones nga gasto sa Cebu Chamber of Commerce and Industry (CCCI) sa pagpahigayon sa Cebu Business Month ulian sa kagamhanan sa dakbayan.

Matud ni Konsehal Margarita “Margot” Osmeña nga maoy pangulo sa komitiba nga dili mahimo ang gisugyot nila ni Konsehal Nida Cabrera ug Sisinio Andales nga ang maong gasto sa CCCI bayran sa dakbayan ug adto kuhaon sa Local Development Fund.

Gitan-aw ni Osmeña ang mga gitugot nga gastohan nga sagad adto ibanon sa LDF ug iyang nakita nga wala masubay ang gasto sa CCCI.

Ang CCCI miingon nga ang ilang gasto nagumikan sa pagpahimo og mga envelope, folders ug mga token nga adunay logo sa CCCI, mga basahon, gasto sa pagkaon, gasto sa pagpahigayon og programa, pagpalit og mga ekipo ug abang sa mga booth, ug uban pa.

Si Osmeña miingon nga ang CCCI magdawat kanunay og hinabang-salapi gikan sa dakbayan sa Sugbo bisan sa panahon pa ni kanhi mayor Tomas Osmeña apan dili anha ibanon sa LDF kun dili adto sa general fund. (/EIM) (BANAT NEWS)