CEBU, Philippines - Tungod sa isyu sa pagkahanaw sa giingong P10 milyones nga koleksyon gikan sa mga estudyante sa Talisay City College (TCC), buot usab ipasusi ni Lapulapu City Mayor Paz Radaza ang operasyon sa Lapulapu City College (LCC).
Kini tungod kay ang nagdumala sa TCC ug LCC usa ra nga mao si Tomas Ramos kinsa gisuspenso sa Commission on Audit.
Atol sa press conference, si Radaza kinsa maoy Chairman sa Board of Trustees sa LCC mipadayag nga dako ang iyang pagsalig ngadto ni Ramos isip presidente sa LCC tungod kay maayo ang performance niini.
Apan tungod sa maong isyu buot niyang makita ang financial statements sa LCC ilabi na ang school fees collection.
Matud pa ni Radaza walay conflict of interest ang trabaho ni Ramos sa maong duha ka eskuylahan gumikan kay kwalipikado kini ug ang iyang pagkatudlo nga president sa maong tunghaan adunay pagtugot sa konseho sa dakbayan sa Lapulapu.
Kahinumduman nga si Ramos gisuspenso og 30 ka adlaw sa dakbayan sa Talisay gumikan sa imbestigasyon sa COA Audit Observation Memorandum (AOM) nga nasutang dunay 10 milyones ka pesos nga “school fees collection†ang wala ma-remit sa City Treasurers Office sa mga tuig 2008, 2009 ug 2012. (/EIM) (BANAT NEWS)