Martinez: Wala gikinahanglan ang peace covenant sa Bogo City
CEBU, Philippines - Nahugno ang pagsuway sa paghimo og peace covenant sa siyudad sa Bogo human dili mosugot si Bogo City Mayor Celestino "Junie" Martinez, Jr. sa pagpahigayon niini.
"No need of this peace covenant kay pulos ra na pakitang- tao," matud pa ni Martinez nga nahinabi sa Banat News kagahapong adlawa. Sa iyang bahin, si Bogo City mayoralty candidate Daphne Salimbangon nagkanayon nga naalarma siya sa maong pronouncement sa mayor kay siya gusto gyud og kahapsay ug kalinaw sa umaabot nga piniliay.
"Nakita na gyud kinsa ang dili gusto og kahapsay diri sa Bogo. Uyon kaayo ko nga adunay peace covenant, pero dili man siya," matud pa ni Salimbangon.
"Let it be an agreement between a gentleman and a lady nga peaceful ang election diri. I've been in politics for more than 20 years, that peace covenants are all useless," tubag pa ni Martinez.
Kini lang bulana, ang mga abogado ni Salimbangon ug Martinez nagmiting uban ni Bogo election officer Michael Angelo Sarno aron sa pagmugna unta sa terms and conditions sa peace covenant.
Ang kampo ni Salimbangon misugyot nga di gamiton ang Barangay Police Action Team ug mga polis ra gyud nga unipormado ang i-deploy ug magpalayo ang mga barangay officials sa polling center human sila makabotar. (/EIM) (BANAT NEWS)
- Latest
