CEBU, Philippines - Naproblema karon ang solid waste management office sa dakbayan sa Talisay kung unsaon nila pagpangolekta sa basura tungod kay nangaguba na usab ang mga garbage trucks sa siyudad.
Si Edwin Nierves mibutyag kini nga ang siyudad dunay 12 ka mga garbage trucks apan tulo na lang karon ang nagdagan kay ang siyam nangaguba kini ug gipang-ayo pa.
Hinuon ang siyudad nag-abang una karon og usa ka truck nga mahakutan og basura. Niadtong Lunes gilauman nga modagan na sa pagbalik ang duha ka mga garbage trucks.
Matud ni Nierves nga niining kuwangan sila sa mga truck gipaningkamutan nilang maapas ang pagpangolekta sa mga basura.
Hinuon dunay mga barangay nga dunay mga garbage truck sama sa San Isidro, Linao ug Poblacion diin daku kaayo kining tabang sa solid waste management kabahin sa pagpangolekta og basura.
Apan matud ni Nierves kadtong mga barangay nga dunay mga garbage truck dili gihapon kini makaato og kolekta sa mga basura diha sa ilang barangay.
Matag adlaw mokabat ngadto sa 100 toneladang basura ang makolekta tungod kay nagkadaghan na usab ang populasyon sa Talisay.
Nabalaka si Nierves nga mapuno dayon ang landfill sa siyudad nga nahimutang ngadto sa Tapul.
Si Nierves midugang nga nangita og paagi ang siyudad nga ma-reduce ang basurang malabay ngadto sa landfill aron dili dayon kini mapuno. (BANAT NEWS)