Duha ka kandidato gimandoan pagpatangtang sa ilang posters

CEBU, Philippines - Duha ka kandidato pagka konsehal nga sakop sa Team Rama ug Bando Osmeña Pundok-Kauswagan (BOPK) ang gimandoan sa Commission on Elections nga panguhaon ang ilang propaganda materials nga gibutang sa pribadong propiyedad  diha sa barangay Carreta sa siyudad sa Sugbu.

Ang opisina ni Cebu City Election Officer Marchel Sarno nakadawat og pormal nga reklamo gikan ni Dennis Maravillas nga maoy miangkong tag-iya sa nahisgutang property nga nahimutang sa dalan J. de Vera Street. Matud ni Maravillas nga wala gyud mananghid kaniya sila si Konsehal Alvin Arcilla ug Sambag 1 Barangay Captain Jerry Guardo nga butangan nila og daghang campaign posters ang iyang property nga gigamit isip truck yard.

Ang usa ka pahina nga reklamo ni Maravillas gipaubanan niya sa hulagway nga nagpakita nga ang ganghaan ug pader sa compound maayong pagkabulit sa daghang campaign posters sa duha ka kandidato.

Si Sarno miisyu na kagahapon og kamandoan ngadto sa duha ka kandidato pagka-konsehal nga ipakuha ang maong mga campaign posters.

Gipasabot ni Sarno nga ang mga campaign posters nga gibutang sa walay pagtugot sa  tag-iya mahimo ra nga panglangkaton. Ang lagda mao nga ang campaign posters ug ubang propaganda materials sa mga kandidato anha ra gyud ibutang sa “common posters area” nga gideklarar sa Comelec.  Sa iyang bahin, gidasig ni Comelec regional director Temie Lambino ang katawhan nga aktibong mokontra sa mga illegal campaign posters nga gipataka lang pamilit.

“Pumupugay ako kay Mr. Maravillar, saludo ako sa kanya because he had taken liberty and exercise that full obligations.”

Giawhag ni Atty. Lambino gahapun sa “Cebu Media and Elections 2013” forum nga gipahigayun sa Police Regional Office 7, Media Center, Camp Sergio Osmeña Sr., Cebu City nga mamahimong moreklamo ang publiko kontra pagpataka og pamilit sa campaign posters.

Matud pa ni Lambino, kung ang tanan mahadlok, dili na mapakgang ang mga magpabadlong nga magpataka’g pamilit og campaign posters.

Hinuon gikalipay ni Lambino nga mas gamay ug limpyo karon ang kadalanan gikan sa mga campaign materials nga gipamilit sa kadalanan kun itandi sa nangaging mga piniliay. (Rene Borromeo ug Fiona Jane Bacuado,CNU Intern/EIM) (BANAT NEWS)