Rama misaad mango grower iyang suportahan

CEBU, Philippines - Gidayeg  ni  Mayor Michael Rama  sa dakbayan  sa Sugbo  ang  dakong  tampo sa mga  mag-uuma   og  mangga  sa  natad  sa  eksportasyon  niini busa andam  siyang  mosuporta  sa maong  sector.

`Si Rama  mibutyag  niini  sa iyang  pagtambong  sa  selebrasyon sa  Mango Festival  sa Philippine Chamber of Mango Industry (PCMI)  nga  gipahigayon  didto  sa Cebu Wetland Resort   sa barangay  Tagonol, dakbayan  sa Sugbo.

Ang  maong  kalihukan gitambongan  usab   sa  mga  opisyal  sa  Department of Agriculture Regional Field Unit 7 (DA RFU-7), mga opisyales ug agricultural staff nga  gikan sa nagkadaiyang Local Government Units (LGUs) ug usab   mga opisyal  sa Department of Agriculture (DA)-7 lakip na  ang mga membro sa PCMI nga gipangunahan   sa president  niini  nga  si Virgie dela Fuente.

Giasoy  ni  Rama  nga  di  hitupngan ang  natampo  sa  mga  mag-uuma  sa  panglawas  sa katawhan  di  lamang  sa  Cebu  kundi  sa tibuok  nasud tungod  kay  kun  wala  ang  mag-uuma  walay  makapakaon  sa  mga  nanagtrabaho  sa nagkalainlaing  industriya  sa nasud.

"Farmers are better in characteristics than anyone else", kini matud pa ni Rama.

Samtang  si  Nenita Seno, Regional Coordinator sa High Value Crops and Development (HVCDP) miawhag  sa  mga  mag-uuma  og  mangga  nga  kinahanglang  labing  hatagan  og  tukmang  pagpalambo  ang  maong  industriya  tungod  kay  gikinahanglan  kaayo  sa  ekonomiya  sa  nasud  ang  dugang  kinitaan  pinaagi sa eksportasyon  sa mangga.

Apan  matud  pa  niya   nga  ang  kamanggahan  sa nasud  ilabi  na  ang  nia  sa Sugbo  nagkinahanglan  og rehabilitasyon   aron  mosaka  ang produksyon  niini  ug  ang  maayong  kalidad  sa iyang  bunga  nga  dili  bintahaan  sa  mga  mangga  nga  gikan sa ubang  nasud  sa kalibotan.

Sa laing bahin si OIC-Regional Technical Director Tomasita Cadungog kini  usab miingon nga target gayud sa DA 7 nga motaas ang produksyon   pinaagi  sa  pagsagop  sa tukma  ug  modernong  teknolohiya  sa   pagpalambo  niini.

Giawhag usab ni Cadungog   ang  mga  mango  grower  nga  makig-alayon  sa  DA7 sa tanan  nilang  panginahanglan  alang  sa pagpalambo  sa ilang  kamanggahan

Sa bahin ni Virgie dela Fuente nga presidente sa PCMI  iyang gihatagan og gibug-aton  ang pagpalig-on sa asosasyon sa  mga  mag-uuma  og  mangga   aron  magkasabotsabot  kini  kanunay  sa mga  angay  buhaton  alang  sa pagpataas  sa  ilang  produksyon.

Gihangyo ni dela Fuente ang tanang nagtanom og mangga nga unta ila kining amumahon pag-ayo aron mabanhaw ang pagka numero uno sa Sugbo  sa  natad sa produksyon sa mangga. (BANAT NEWS)