4 ka senador suportahan sa BOPK

CEBU, Philippines - Upat ka senador ang kampanyahan pag-ayo sa Bando Osmeña Pundok Kauswagan (BOPK) alang sa umaabot nga eleksyon tungod kay nakatabang kini pag-ayo sa katawhan sa dakbayan.  Sila mao si Senador Chiz Escudero, Edgardo Angara, Ramon Magsaysay ug Cynthia Villar, parehong mga kandidato ubos sa partido Liberal. Gitataw ni Osmeña nga misuporta usab siya sa ubang LP senatorial candidates apan dili sama ang ilang pagpangampanya sa upat.

Ang rason nga tabangan sa BOPK ang upat ka kandidato mao nga si Escudero daku kaayo kini’g natabang kay gihatagan og tagsa ka multicab ang tanang 80 ka barangay dinhi sa dakbayan.

Gawas sa mga multicab nga gihatag na sa kabarangayan, aduna pay laraw nga mohatag usab kini og duha ka trak sa bombero dinhi sa dakbayan sa Sugbo.

Si Escudero migahin usab og P10 ka milyon alang sa pagpalit og mga tambal dili ra kay sa mga kabus nga lumulopyo sa dakbayan, kun dili apil na sa ubang mga lungsod sa Sugbo.

Matud ni Osmeña nga si Magsaysay migahin usab og salapi aron matukod ang lainlaing water projects dinhi sa dakbayan.

Si Villar migahin usab og budget alang sa medical assistance sa mga kabus nga Sugboanon samtang si Angara mihatag usab og hinabang aron mapatukod ang pipila ka proyekto, sama sa sports complex ug pagpasemento sa karsada. (/WC) (BANAT NEWS)