CEBU, Philippines - Gipalanog ni kanhi Danao City mayor Jesus Don Durano ang iyang panawagan nga hatagan og kagawasan ang mga botante sa mga kalungsoran sa isla sa Camotes nga makapili sa ilang kaugalingong kandidato karong umaabot piniliay sa Mayo .
Gipagawas ang maong panawagan ni Don Durano human niya masayri nga may mga residente sa kalungsoran sa isla sa Camotes ilabina sa lungsod sa Poro nga nakasinati na og pagpanghulga sa mga armadong mga tawo nga gituohang mga goons sa mga kaatbang sa politika atol sa pagbisita sa mga kandidato sa One Cebu party sa kalungsoran ug kabarangayan sa maong isla sa milabay nga adlaw.
Giaghat usab ni Don Durano ang katawhan sa Camotes nga dili mahadlok sa mga hulga sa giingong mga goons aron lamang paboran ang mga kandidato sa ilang partido.
Iyang gitataw nga wala siya magdasig og mga kandidato sa partido kay buot niya nga kahatagan og kagawasan ang katawhan sa maong isla nga makapili gyud og kandidato nga ilang gituohan nga makahatag og proyekto sa ilang lugar aron usab mas molambo pa ang ilang mga panginabuhi.
Gipasalig ni Durano nga mohimo sila og lakang pagsanta sa pagpanghulga nga gihimo sa mga tawong armado nga nagsuroysuroy sa kabalayan sa kalungsoran sa Camotes.
Hinuon ang mga kandidato sa BAKUD party nga kaalyado sa Liberal party kusganong mihimakak sa pasangil nga sila maoy nanghadlok sa mga molupyo sa Camotes.
Gitataw niini nga ang maong isyu mugna lamang sa ilang mga kaatbang sa politika. (BANAT NEWS)