Habal-habal gi-ambush

CEBU, Philippines - Patay ang drayber sa habal-habal ug na-angol ang iyahang duha ka mga pasahero dihang giambusan sa upat ka mga suspek didto sa barangay road sa barangay Cogon sa lungsod sa Dumanjug niadtong Miyerkules sa alas 4:30 sa kaadlawon.

Ang biktima mao si Noel Gabutero, 30, taga barangay Candabong, Dumanjug  samtang angol ang duha niya ka mga pasahero nga sila si Junrey Cristobal, 27, asawa nga si Miriam Cristobal, 25,  igsoon ra usab sa biktima nga drayber.

Ang suspek gihulagway sa mga nakasaksi nga upat ka mga lalaki nga pulos armado nga nag-atang nang daan sa lugar.

Matud ni PO3 Dionisio Tagupa sa Dumanjug Police dihang nahinabi sa Banat News paingon nga maghatud sa iyang mga pasahero sa lungsod ug pag-abot sa maong lugar gitabangan kini og pusil.

Ang mga suspek nag-iyahay og ikyas una pa nangabot ang mga molupyo nga midala kanila sa tambalanan apan patay na si Gabutero samtang nakagawas ra sa tambalanan ang magtiayong Cristobal. Walo ka basiyo sa  bala sa M-16 rifle  ug unom ka basiyo sa kalibre .45 ug deformed slug ug laing usa ka buhing bala sa .45 ang nakuha diha sa crime scene.

Wala pa matino sa kapulisan ang motibo sa krimen apan nasayran nga supporter ni kanhi mayor Sarsi Baricuatro ang mga biktima. (BANAT NEWS)