CIB gipasanginlang migamit sa ebidensya nga sakyanan

CEBU, Philippines - Gipasanginlan karon sa usa ka militanteng pundok ang City Intelligence Branch sa Cebu City Police Office nga migamit og sakyanan nga ebidensya sa krimen atol sa ilang operasyon.

Base sa press statement nga gipadala sa Karapatan-Central Visayas, atol sa selebrasyon sa Womens Day ilang nasigpatan ang usa ka olive- green nga Kia Rio Sedan nga adunay plakang YGD-234 nga giingong gisakyan og mga polis  nga nagpunay og kuha og hulagway sa ilang gipahigayong selebrasyon.

Matud pa sa Karapatan base sa ilang pagsusi-susi, ang maong sakyanan gigamit sa mga suspects kaniadto sa mga kaso sa drive-by-shootings dinhi sa siyudad.

“The vehicle turned out to be the same car used in a series drive-by-shooting last year,” matud pa sa Karapatan.

Butyag pa nila, nga ang maong sakyanan, gi-turn-over ngadto sa buhatan sa CIB. Gipadayag usab sa grupo nga ilaha nang gidangop ang maong reklamo ngadto sa buhatan sa Office of the Ombudsman ug sa Land Transportation Office aron masuta ug kun aduna bay posibling criminal liability ang CIB.

“Official or unofficial, such appropriation is just as condemnable as the purpose of its use, which is to curtail a peaceful assembly,” tipik sa press statement sa grupo.

Ang hepe sa CIB, chief Insp. Romeo Santander, mipadayag nga wala sila makagamit sa maong sakyanan ug iyang giklaro nga nasayod usab sila kun angayan ba kini nga gamiton o dili.

Matud pa ni Santander niadto pang buwan sa Hunyo o Hulyo nauli sa mga kamot sa pamilyang Pacador ang maong sakyanan.

“Let’s be transparent, maski akong mga taw ipa-pinpoint nila ug asa ana nila. I respect (Karapatan) a lot, I don’t know unsay ku-an nila, ang ako lang transparency lang unta ba,” pasabot pa ni Santander. Samtang ang hepe sa kapolisan sa dakbayan sa Sugbo Sr. Supt. Mariano Natuel Jr., mikompirmar nga dili taga CIB ang migamit sa maong sakyanan kun dili polis nga nadestino sa Station 2 nga maoy mi-asumir sa sakyanan.

Gipasabot ni Natuel nga ang maong sakyanan na-loan sa pamilyang Pacador ug ang polis nga anaa madestino sa Station 2 ang ni-asume niini apan gi-agi pa usab kini og korte tungod kay usa man kini sa mga ebidensya. “Gigamit nang sakyanan pero dili police sa CIB kundili police nga na-asign sa Station 2,” pasabot pa ni Natuel.

Dako usab ang pagtuo ni Natuel nga dihang nakit-an sa Karapatan ang sakyanan nga polis ang sakay sa awto nag-asume dayon sila nga taga CIB ang maong polis tungod kay ang CIB man ang nag-handle sa usa sa mga kaso sa drive-by-shootings niadtong buwan sa Enero sa miaging tuig. (BANAT NEWS)